Venderdis sogn 1987 ei ina gruppa entuorn igl iniziant Alfons Jacomet seradunada a Segnas per sediscussiunar davart l'idea da fundar ina musca da tscheiver. Gia dus meins pli tard ei la musica da tscheiver Las Fifferlottas Segnas naschida a caschun dall'emprema radunonza.

​

Dapi lu ei l'uniun sesviluppada cuntinuadamein tier ina musica da tscheiver fetg dinamica che s'engascha cun differentas activitads pil tscheiver sursilvan. Tradiziunalmein separticipescha l'uniun era inaga ad onn a tscheivers ella Bassa. Aschia ein Las Fifferlottas denter auter stadas envidadas a tscheivers el cantun Vad, a Lucerna ni era a Turitg. Nunemblideivels ei aunc oz il viadi tier il grond tscheiver a Mulhouse.

​

Era per il tscheiver naziunal ei l'uniun s'engaschada. Ils onns 1999 e 2007 han las radunonzas da delegai dalla HEFARI (uniun tetgala dil tscheiver svizzer) cun 1'500 hosps giu liug a Mustér. Ina gada han Las Fifferlottas organisau persulas gl'inscunter e l'autra gada ensemen cun Las Bagordas. 

​

35 onns pli tard viva l'uniun aunc adina pil tscheiver sisum la Surselva. Onn per onn s'entaupan ils musicants e las musicantas mintgamai naven digl atun entochen ch'il tscheiver va liber ed exerciteschan per saver sepresentar ad occurrenzas da tscheiver.